Sunday Zingsang

  "SundayZingsang  "

                      *************

            Ka neulai (cise leng tun ka gol luat loh hang) in nipi zingsang hong tun a Sunday School kah ding kal ngaklah lua, lawppi lawptal a lawp in zan zong ihmu thei lo liang, cikciang ak hong khuangin ni hong suak tam aw cia lupna tungah kipei pei mai. Zingni hong suak petmah teh lupna tungpan diang kheh pah lian, mai phiat, kisil khit teh zing niangtui dawn kawm a innka tungpan veng naupangte zak ngiat ding in la (song) sa pah teuteu lel:
    Ka nuin hong gen zel a Zeisu hong itna thu,          
    Zeisu leh naupangno te a kikhawl zel ci                                                        
    Kei zong Zeisu ka it man nipi zingsang ciang
   Lawm aw hong zawn zel ning maw nang zong nong zui diam?
   Sunday School ah kei pai ning, lawm aw ki thawi  ve
   Zekai kha ve ni, Sunday School ah kei pai ning….                             

            Tua hun lai khong anuam tak na hi mawk! Tun lah kum hong tam ta, tuah khak leh phut khak leitung tawh a kikhen thei lo haksatna, nopna  dahna leh khituiluanna te hangin nipi zingsang hong tunkal ding ngaklahna hong kibang nawn hiau lo.

            Pawlkhatte puan thak, puan hoih, khedap thak khong nei kei leh kikhawm nuam lo mawk! Pawlkhatte leu leu biakinn ah Pasian be dinga pai takpi Nightclub pai ding mahmah bang liang. Nikten puansilh deih dan leh hoihsak dan hong tuamdang ta mah aive maw. A kifit thei thei, a kidawk thei thei, a sing thei thei leh akilang suak thei thopuan nam peuh puan a khuiin biakinn sung peuh ah hong lut pih, nungak pawlkhat in phei tunga meima pawn vom phiatphuat leh tangai tui keukau khawng zong maizum pih cih thadah kidawk sak nuam citciat lai, a tuateng mah mu nuam a biakinn hong pai tangval leh papi khinsa te lah bei tuan lo…Sunday neipa Pasian i zahtakna koiah om ta hiam!? cithei kha zel ing. Ka khangno zawk deuh laiin Sunday hong tun simin sam met, bawmbi leh puanak taih maat dikdek, khedap zong te daldal liang maha zut kilkel in siangtho taka kizem, SMART  taka biakinn lam zuan, Laisiangtho leh labu mangngilh ngei ngiat lo hilai… tua banga lungsim siangtho taka kikhop pen nuam mah mah in, i thungetna leh i lasakte zong namtui in siangtho zaw deuh hamtang se hi. Tu hun leh hua hunlai pen kibang nawn lo, khantohna lamah kiamsuk i hiam, kiamsukna lamah khangto i hiam tel zo nawn kei mawk ing!

    Bang bang i ci tazongin Sunday pen a kuama ciat in aki ngaklah nahi mawk hi. Ngaklahna ahang (reason) kibang lo bek a maw. Nasemte ading tawlngak hun, sangnaupangte ading  zau vak hun, zu kih lote ading lawm leh gual tawh lu leh taw thei lo lianga zu dawn khop hun, lawm kingaite ading in lah ni manpha na hi mawk hi. Tuahang hiding hiven Daniel Boone in Beautiful Sunday a phuahna ah hibangin na gelh se hi:

Hi, hi, hi, Beautiful Sunday,                                 
This is my, my, my, beautiful day
When you say , say, say, that you love me
Oh my, my, my, it’s a beautiful day..

            A tawpna ah nang leh kei kidong pha ni, Laisiangtho sunga Pasian deihdan in Sunday ni  i siangtho sak hiam?

------------------------------------

Francis Lamthang

Dip.Human Right & B.A

(Journalism)

St. Joseph’s Collage, Bangalore

 Ref: BZF Khasim Laihawm Lom Khat- Hawm kuana ,May,2011