Kawlgam Biakna Makaite Kikhopna ah Aung San Suu Kyi Kihel

Christian Conference of Asia (CCA)leh Myanmar Council of Churches (MCC)te makaihna tawh abeisa August ni 2-5,2012 sung Kawlgam sung a om biakna makaipite' kimuhkhopna (Christian Consultation) khat MCC Headquarters Yangon ah thupitak kinei hi. Tua laiah adiakdiak in Kawlgam sungah kilemkikna (Reconciliation) thak khat a om theihna ding, leitungbup in thupi asak mahmah leh mihingte’ nuntakna kepbitna, suahtakna leh Kawlgam Democracy diktak a om theihna ding ahanciam den NLD makaipi Daw Aung San Suu Kyi zong kihelthei hi.

Tua kimuhkhopna hun ah Daw ASSK in thugenna nei a, “Huatna leh hazaatna te i paisan ciang bekin ki unauna leh kilemna om thei bek a, Ki Unauna pen amah bekin om thei lo hi. Ki Unauna i neih ciang bekin, kilemna leh bitna i cihte a om thei ding hipan hi. Tua banah minam khat peuhpeuh ki-unauna a neih theih kei leh cih mahin kilemna nei thei ngeilo ding hi” ci-in gen hi. Politics hanga thongkiate lakah minthang mahmah khat ahi Daw Aung Suu Kyi in ki-unauna leh kilemna thu pen maantakin zang le kalsuanpih takpi ahih manin, Kawlgam politics hong kilumlet zo ahi hi.

Abeisa 1991 kumin Norway gam Oslo khuapi pan Nobel Peace Prize kipia a, ahi zongin Kawlgam galkap kumpite' khumcipna hangin, tukum June,2012 sungin a ma khut tung ngiatah piakkhiatna kinei kik hi. ASSK in agenna ah, " Nobel Peace ka saanna hangin gamgi pua lamah Democracy a taangko khia ka suak hi" ci in MCC Headquarters, Yangon ah gen hi. Tua bek tham loin, hih Nobel Peace Prize in ka lungsim kongpi hong honsak hi ci lai hi.

Tua banah kilemkikna a om theihna ding lampi zon akisap zia agenna ah, “Mi thumaante in amau thu bek tawh vaihawm loin, kilemkikna dinga a kisam mahmah ahi midangte deihna lak ding athupit ziate gen hi. Midangte kiang pan nahoih muhkhiat theihna peen kilemna ding thubulpi (Foundation) hi" ci-in gen hi.

Kilemkikna a om theihna dinga gamgi kaan kul:

“Midang a hazaa pa in mi khempeuh hazaa den ding hi. Midangte huatna pen mihingte’ gaal lian pen hi. Mihingin amah mah a kimuanzawh kei leh, midangte’ sepkhelhna(mawhna) zong den kei in, mite huat ding bekbek ngaihsun hi" cih gen hi. Hih bang mite in gam leh minam sungah kithutuakna susia uh hi. Kihuatna leh hazaatna gamgi i kaan khit ciang bekin, kilemna leh kithutuahna nei thei pan ding hi hang” ci in Suu Kyi in gen hi. Suu Kyi in a genbehna ah, " thudik leh thumaan deihna lungsim tawh na hunzeekna uh (programmes) lumlet dih unla, kithutuakna amasa penin koih un. Tua khitteh kilemna om thei pan dinga, kilemna i neih khit ciangin bitna ( Secure) hong om thei pan ding hi” ci hi.

Tua banah neek-le-taak zonna, democracy picinsakna leh daan vaihawmna tawh kisai, leitungbup minam khempeuh’ mawhpuakna tawh kisai dotna hih bangin Suu Kyi in dawng hi. Dan vaihawmna leh diktatna pen kikhenkhia thei ngeingei lo hi. Nek-le-taak zonna lam a khantohna pen Democracy khekna ding hilo a, kilemna a om theina dingin politics lama i khantoh pih ding kisam hi. Hih bang haksatna in a sukbuai gamte ah minam tuamtuamte in kilemna a om theihna dingin mawhpuakna lianpi nei ciat uh hi " ci in gen hi.

Hih CCIA kamkupna sungah “Attempting to evolve strategies for peace building in politically and ethnically divided Myanmar” ah palai 40 bang kihelin, Palai pai khawmte in Kawlgam sung a om Kristian pawl tuamtuamte’n Kawlgam sungah Kumpite le mualmite kikal buaina, biakna khat le khat kikal buainate kilemna leh muanna a omtheihna dingin thukhun tuamtuam bawl khawm uh cih kiza hi.

Ref: Tongsan

Translated & Posted by: Tongsan Media group